الجراحة في مصر القديمة
كتبت/ روان ايمن محمد
اليوم هدخلك قسم الجراحة عندنا في مصر زمان و هحكيلك ازاي المصري زمان كان متطور و مبتكر في مجال الجراحة …
الطبيب المصري زمان كان هو أول من عمل العمليات الجراحية التعويضية واول من عرف زراعة الأعضاء وعمل عمليات دقيقة في العين واقدر اديك مثال على ده أنهم لقوا مومياء فيها عين اصطناعية شبه العين الحقيقة بالضبط ودي حاجة مبهرة جدا اللي يوصل المصري أنه يقدر يعمل كده في العين فأكيد يقدر يعمل اكتر من كده في المجال ده ، و عرفوا خيوط الجراحة و بالنسبة الخيوط دي فتقدر تلاقي مومياوات موجودة في المتحف المصري فيها اثار لعمليات جراحية استخدم فيها الخيوط دي .
استخدم المصري القديم عسل النحل في الجراحات كمضاد للالتهاب .
المصري كان اول جراح في التاريخ الإنساني و اللي يثبت كلامي ده هو انك لو رحت معبد ( كوم امبو ) بالأقصر هنشوف النقوش الهيروغليفية للادوات الجراحية اللي استخدمها المصري في عملياته الجراحية لان كان عندهم وفرة في الآلات الجراحية ، ما بين بقى مجسات و مشارط و مناشير و ملاقط و مقصات جراحية ، و في لوحة كاملة شرحت عملية الختان كاملة و دي بتعود للأسرة السادسة .
و اللي ياكد لي تفوق المصري زمان جراحياً ، أن الباحثين لقوا مسمار حديد طوله 23 سم في مفصل ركبة مومياء و ده دليل أن تم إجراء عملية جراحية مفصلية للمريض و توثيقا للجراحة دي الباحثين استخدموا عدسة تصويرية دخلوها من ثقب في عظم الركبة و اللي خلى الكل يتفاجأ أن العملية دي كانت متطورة جدا و اتعملت في الوقت ده من أكثر من ثلاث الاف سنة .
طور المصري اشكال العمليات الجراحية و كان أحد الاشكال دي، هي ” النقب ” ، النقب دي عبارة عن فتحة صغيرة في الجمجمة بهدف أنهم يعالجوا المخ من بعض الأمراض و ده بياكد أن مصر كانت حضارة متطورة جدا من ناحية جراحية ، حيث اننا لقينا رفات عمره 2650 سنة ق.م فيه ثقبين في الفك السفلي قريب من جذر الضرس الاول علشان يعالج نزيف ناتج عن جراحة الأسنان .
و طبعا مفيش دكتور ليدخل في عملية من غير ما يكشف و يشخص حالة المريض الي معاه ، و كان الأطباء في مصر بيعرفوا إذا كانت البنت دي هتبقى حامل او عاقر .
الأطباء المصريين بردو كانوا أول من استخدم العلاج بالكي و ذكرت بردية لندن عمليات الكي و ازاي كانت بتتعمل و صنفت الأمراض الي كانت بتحتاج عمليات الكي زي مثلا امراض الروماتيزم و التهاب المفاصل و غيره .
المصري عرف بردو عن مرض السكري و عرفوا ازاي يعالجوه ، طبعا هتيجي تقولي و هم عرفوا ازاي اصل مكنش عندهم جهاز و سكر و الحجات اللي بنستخدمها اليومين دول أنا هقولك هم كانوا بيبصوا على بطن المريض فلو لقوا فيها ضمور و تجاعيد فده كان مؤشر أن الشخص ده عنده السكر و عن طريق البول فلو كان لزج زي العصير او العسل فده كان مؤشر كمان و كان علاج مرض السكر عن طريق استخدام أكسيد الحديد مع الحنظل و زيت بذر الكتان و الزيت ده استخدم بردو في عمليات البواسير و الجروح و التقيحات و كان الخليط ده بيتاخذ بعد الصحيان من نوم بشكل مباشر و المريض جعان و يشرب مياه كتييير و لمدة اربع ايام ، و استخدموا البصل في تنظيم و تقليل من سكر في الدم و دي طريقة عرفناها من بردية ايبرز .
ممارسة الطب نفسه في مصر مكنش بيتعمل في اي مكان و سلام لا طبعاً ده كان ليه مستشفيات و عيادات و كانت بتتسمى بدار الشفاء و كان طبعا كان في تخصصات و اقسام و كان لكل تخصص كبير أطباء و مشرف عام على الأطباء و بيتاكد من سلامة بيوت الحياة و الادوية المناسبة لكل مريض بجانب رئيس العام للأطباء الي بيرئس كل الأطباء و مشرفين ، و الأطباء بشكل عام كانوا كلهم تلاميذ بمدارس اسمها بيوت الحياة.
وبس كده دي نبذة بسيطة عن قسم جراحة عندنا في مصر زمان و لسه مجالات الطب كبيرة و متشعبة و بجد very interesting أن الواحد يتعرف عليها .
