هبة شاهين تكتب: حين تصبح “عيوبي” دروعًا

قالوا عليا مغرورة.. قالوا عنيدة.. قالوا حادة.. قالوا وقالوا كلام كتير أوي_

قلتلهم: أنا أكبر من كلامكم بكتير.

آه أنا عنيدة. عنيدة عشان الدنيا حاولت تكسرني وأنا قلت لأ. وقفت في وش الريح لما ناس كتير وطّت، وشيلت ليالي تقيلة محدش شال وجعها غيري. عنادي ده مش عند وخلاص، ده صبر استوى على نار هادية.

وآه يمكن أكون مغرورة. مغرورة عشان وشي مفيهوش لونين. اللي في قلبي على لساني، ومبعرفش أضحك في وش حد وأنا من جوايا مش طايقاه. مبعرفش أجامل على حساب نفسي، ولا ألبس وش يرضي الناس ويخنقني أنا.

وأنا حادة، مظبوط. حادة عشان مبحبش اللف والدوران ولا الكلام المتزوق. كلمتي واحدة، وحدودي باينة. اللي عايزني يحبني على طبيعتي، واللي مش عاجبه الباب يفوت جمل.

فـ قبل ما تحكموا عليا بكلمتين، تعالوا اسمعوا الحكاية من أولها. هتلاقوا إن كل حاجة شايفينها عيب فيا، كانت هي الدرع اللي ساندني عشان أفضل واقفة على حيلي.

أنا مش ملاك ولا كاملة، بس حقيقية. وعلى الأقل بنام وضميري مرتاح، وده عندي بالدنيا.