الفرق بين فرط الحركة و الشقاوة عند الأطفال..

الاء طارق اخصائيه تخاطب و تعديل سلوك و تنميه مهارات و صعوبات تعلم

الفرق بين فرط الحركة و الشقاوة عند الأطفال.

أولا:
الطفل الشقى : هو طفل ذكى عاوز يلفت الانتباه ويكتشف العالم من حوله وبتكون طريقة لعبه متزنة ع مدار اليوم وهتلاقية الصبح نشيط و بيلعب ويبدأ يقل نشاطة ع مدار اليوم تدريجياً لحد النوم ، ولما ينام بيكون هادي جداً ف نومه و بينام من 8 الى 12 ساعة حسب عمره الزمنى طبعاً

* أما الطفل المصاب بإضطراب فرط الحركة : بتكون حركتة زايدة جداً أكتر من اللازم و أندفاعى و بيقع كتير و يتخبط فى أى حاجة وهو ماشى ومش مركز خالص ، و كتير الحركة بلا هدف و بيكون نشاطة طوال اليوم عالى ، حتى ف أخر اليوم و نومه غير منظم و قليل جداً حوالى 4 ساعات وأحياناً متقطعة كمان .

وبيكون ليه 3 أنواع أو أشكال وهم :-
1- فرط الحركة فقط .
2- نقص الانتباه وضعف التركيز .
3- فرط الحركة وتشتت الانتباه
كده عرفنا .. اذا كان ابننا شقي ولا عنده فرط الحركة.
تعالوا بقي اعرفكم نعمل ايه مع الطفل الشقي ده عشان يهدا .. و ايه علاج اطفال فرط الحركة والتغذية المناسبة ليهم واي الطعام اللي مينفعش يأكلوه.

اولا لازم نعرف ان الشقاوة دي صفه مكتسبه من البيئة المحيطه يعني لو الجو اللي هو عايش فيه جو هادي ومفيهوش عصبيه وخناق ودوشة مكنش هيبقى شقي كدا ف المشكله عندنا بنسبه كبيره ولازم نصلح ده الاول وبعدها سلوك الطفل هيتعدل تلقائيا..

عاوزين تعرفوا نعمل ايه ؟

اولا لازم يمارس رياضه ولو حتي مجرد انه يطلع يتمشي، يجري.. بس حاجه يطلع فيها كل طاقته الزايده (ولو هيمارس رياضه معينة خليه هو اللي يختارها متفرضيش عليه حاجة)
ميبقاش قاعد ف البيت طول اليوم وعاوزينه يقعد متربع ومؤدب ومستنيين منه نعم وحاضر … مش هيحصل ده.

الأكل الصحي ده اساسي ف اكله .. نقلل بقي أكل السكريات والمواد الحافظه والشيكولاتة والشاي والقهوه والبيبسي وغيره… لانها بتزود الحركة عند الأطفال (وده موضوع كل الابحاث اجمعت عليه مش كلام وخلاص) ومتضعفوش قدامهم وتقولوا اهي حاجه تسد احسن من بلاش وعلشان يبطل عياط.. لا بالعكس هو كدا هيجوع ولما يجوع هياكل اكلنا عادي وده مع التدريب المستمر.. لكن احنا سايبينهم يمشونا بمزاجهم ويضغطوا علينا برفضهم للأكل عشان تجيبولهم الشيبسي وده عن عمد منهم (العيل ده ناصح متستهونوش بيه هو بيرفض مخصوص عشان تجيبله اللي هو عايزه

لازم تنظمي وقته (وقت يذاكر فيه – وقت ينام فيه – وقت يلعب فيه – ….) ويكون في ثواب وعقاب علي التنظيم ده ..تمدحيه, تجيبيله هدايا, خروجات بقي,ومكافأت, وتحرميه من ده لو مش بينفذ الخطوات دي..

نبعد عن الموبايل والتليفزيون
نبعد عن الموبايل والتليفزيون
نبعد عنهم علشان دول كارثة
– الطفل اللي اكبر من سنتين اخره ساعتين ف اليوم ومش متصلين
– اللي بين السنه والسنتين اخره ساعه ويكون فيه رقابة وبردو مش متصلين
– اللي قبل سنه ممنوع نهائي اي موبايل او تليفزيون
اكتر حاجه بتخليهم مهيبرين هو ده لانه بيعملهم تشتيت ذهني وخاصة لو محتوي فيه ضرب وأكشن….

لازم الجو العام ف البيت يكون هادي ميبقاش بقي خناق وزعيق وضرب وتقوليلي هو شقي ليه ونرجع ونقول الشقاوة دي حاجه مكتسبه من اللي حواليه ياجماعه يعني ع حسب بيئة الطفل بقى.

الشقاوة دي حاجه طبيعيه مع وجود اختلاف نسبي بين الاطفال وده مقبول ونحاول نستحمل الطفل.

طب دي حلول الشقاوة طب لو ابني فعلا عنده فرط حركه اعمل ايه معاه ؟!

اول حاجة نروح لدكتور متخصص لأننا غالبا هنحتاج جلسات علاجيه وادويه ودي الدكتور اللي بيحددها.. لازم الدكتور المعالج هو اللي يقيم امورنا وبناء عليه بيعالجه .. وياريت بلاش نعالجهم من الفيس وجروبات الماميز.. لأن كل طفل ليه ظروف بتختلف عن الطفل التاني ودرجة مرضه بتختلف برده وع اساسها الدكتور بيفرق ويعالج.. و كمان محتاج متابعه كل فتره عشان نعرف احنا وصلنا لفين ..

طب انا اتعامل معاه ازاي وايه الأكلات اللي يتمنع منها وايه الاكلات اللي ياخدها ؟

اولا محتاجين يكون في حب وتقبل منكم له (لأن الاب والأم للاسف بيبقوا قرفانين منه ومش طايقينه وده غلط جدا ع نفسية الطفل.. هو مش بمزاجه ياجماعه ده مرض) لازم تقبلوه واتقبلوا كل سلوكياته
حاولوا تخلوه يلعب لعبه جماعية او العاب الذاكرة والعاب التمييز

الأكلات_الممنوعة
1- الحلويات والسكريات والمواد الحافظه .
2- البيبسي والمشروبات الغازيه – الكافيين (الشاي .. القهوة .. الشيكولاته)
3- الخضار المجمد والالوان الصناعية
4- الكعك والمخبوزات
5- الوجبات السريعة
6- الدهون والأكلات المقلية

الاكلات اللي مفروض يأكلها بقى اي هي؟
سمك التونه والسلمون (وناخد بالنا مش كل انواع السمك) الجبن والزبادي… العدس… الخضار الأخضر (خاصة السبانخ)… والفواكه… المكسرات… البروتين والبيض … لبن الصويا …الموز

-وبكدا نكون عرفنا نفرق بين الشقاوه وفرط الحركه وكمان عرفنا نتعامل ازاي مع كل وضع فيهم..